Union Minister 2-in banna thehlut

Prime minister Narendra Modi kaihhruai National Demcoratic Alliance (NDA) sorkara minister pahnih chuan Parliament member an nihna term a tawp tak avangin nimin khan minister an nihna aṭanga banna an thehlut.

Minister aṭanga bangte hi minority affairs minister Mukhtar Abbas Naqvi leh steel minister RCP Singh-te an ni. An pahnih hian Rajya Sabha member ve ve niin, nimin khan an term a tawp a ni. Vawiin aṭangin Parliament member an ni tawh dawn lo a, hei vang hian nimin khan President Ram Nath Kovind hnenah minister an nihna aṭanga banna hi an thehlut a ni.

President Kovind chuan PM Modi thurawn angin, minister pahnihte banna thehluh hi a lo pawmsak nghal tih Rashtrapati Bhavan thuchhuah chuan a tarlang.

Minister pahnihte banna pawmsak a nih hnuah, women and child development minister Smriti Zubin Irani chu a ministry bakah minority affairs lo enkawl tur leh, civil aviation minister Jyotiraditya Scindia pawh steel ministry lo enkawl tel tura ruat a ni.

Mukhtar Abbas Naqvi term a tawp tak avangin, Parliament-a BJP-in member 395 a neih zingah Muslim an awm dawn ta lo a ni. Naqvi hi BJP-in MP pathum a neih zinga pakhat a ni a, Muslim MP a neih dang pahnihte pawh hi an term a tawp tawh a, Rajya Sabha member turin an nominate zui tawh lo.