Nirbhaya case : SC-in thi tura hremna pek nemnghet

Supreme Court chuan nimin khan Nirbhaya gang-rape case-a Delhi High Court-in thiam loh chantir mi pali-te hnena thi tura hremna a lo pek tawh chu nenmghetin, kenkawh a ni dawn.

Court thupek hi Justice pathum, Dipak Misra, R Banumathi leh Ashok Bhushan awmna bench chuan a puang a ni.

Kum 2012, December 16 zan khan zirlai hmeichhe pakhat, kum 23 mi chu South Delhi-a bus tlanlai chhungah mi parukin rawng takin an pawngsual rawn a, an zingah hian kum tling lo pakhat a tel. Hmeichhia hi an pawngsual hnuah motor aṭangin an paihchhuak zui a ni. He hmeichhia hian hliam na tak a tuar a, Singapore hospital-ah hruai a ni a, December 29 khan a hliam tuar loin a thi a ni. He pawikhawihna rapthlak hian ram mipuite a tithinur hle a, hmun tam takah duh lohna lantira nawrh huaihawt a ni a, pawngsualtu leh mipat hmeichhiat lam hawia pawikhawihte hremna na zawk pekna turin dan pawh siamṭhat a ni bawk.

Delhi High Court chuan pawngsualtute hi thi tura hremna a lo pe tawh a, hei hi Supreme Court-ah an appeal a ni. Nimin Supreme Court chuan ngaihtuahin an ngenna hi a hnawlsak a, High Court-in hremna a lo pek tawh hi a pawmpui thu sawiin, pawngsualtu mi pali-te chu khaihlum turin a ti ta a ni.

Pawngsualtu mi paruk zinga pakhat chu man a nih hnuin tan-inah a intihlum a, pakhat erawh chu kum tling lo a nih avangin remand home-ah dah a ni a, a awm theih hun a tlak hnuah chhuah a ni. Midang pali - Mukesh, Pawan, Vinay Sharma leh Akshay Kumar Singh-te chu tan-inah an la tang mek.