India-in UN-ah sakhaw tihbik nei lo ram a nih thu a sawi

Attorney General Mukul Rohatgi chuan Geneva-a United Nations Human Rights Council meeting-ah India ram chu sakhaw tih bik nei lo ram a nih thu leh, sakhua leh hnam tlem zawkte dikna chanvo a humhalh sak thu a sawi.

UNHRC meeting-ah hian member ramte human rights record-te ennawn a ni a, meeting ṭan hma hian member tinte chuan report an pe a, an report behchhan hian ram dangten zawhna an siam theih bakah, insawifiah tur pawhin an phut theih a ni. Pakistan palai chuan Kashmir tualchhung buaina chungchang sawichhuakin, India security force-te’n mipui hnawhdarhna atana musep an hman ṭhin khapsak a phut thu a sawi. Hei bakah hian Kashmir tualchhung dinhmun dik tak hriatchian a nih theih nan UNHRC fact-finding team tirh phalsak turin India a phut bawk. Pakistan palai chuan India rama sakhaw tlem zawk - Muslim, Sikh, Kristian leh Dalit-te’n kut an tawrh ṭhin chungchang pawh a sawichhuak a ni.

Pakistan palai zawhna hi Rohatgi chuan chhangin, India ramah hnam, sakhua leh vun rawng avanga inthliarhranna a awm loh thu a sawi. India chu sakhaw tin zalenna, state religion bik awm lohna a ni, a ti. Danpui chuan sakhaw hrang hrang zuitue chu zalenna a pek vek thu a sawi. Sipaite hnena thuneihna sang zawk pekna dan, Armed Forces Special Powers Act (AFSPA) chu ram buai lai bikah chauh hman a nih thu a sawi bawk.