SC-in Uddhav Thackeray lamṭangte petition ngaihtuah dawn

Supreme Court chuan Maharashtra-a Shiv Sena party-a Uddhav Thackeray lamṭangten chief minister atana an party MLA hel, Eknath Shinde dah a nih chungchang an khinna chu July 11-a ngaihtuah a remti.

Justice Indira Banerjee leh JK Mahe­shwari awmna vacation bench chuan Uddhav Thackeray lamṭang­te petition thehluh hi July 11-a ngaihtuah turin dah a ni tih an sawi a ni.

Shiv Sena hruaitu Subhash Desai chuan June 30-a governor Bhagat Singh Koshyari-a'n Shiv Sena MLA hel, Eknath Shinde kaihhruai leh BJP te sorkar thar siam tura a sawmna hi a khing a ni. Hei bakah hian July 3 leh July 4-a Assembly House Speaker thar a ni leh,Shinde kaihhruai sorkar fiah a nih pawh an khing tel bawk.

Eknath Shinde kaihhruai Shiv Sena MLA -te hi an hel avangin Shiv Sena, Nationalist Congress Party (NCP) leh Congress party-in ṭangrual sorkar, Maha Vikas Aghadi (MVA) sorkar a tlakchhiat phah a, Shinde hote leh BJP hian sorkar thar siamin Shinde hi chief minister-ah dah a ni.

Shinde lamṭangte hian MLA an neih tam zawk avangin Shiv Sena dik tak zawk niin an inchhal zui a, hei hi Thackeray chuan phatsantu zawk an nih avangin Shinde lamṭangte chu Sena an ni ve tawh lo, a ti. Shiv Sena party symbol chu tumahin an laksak theih a ni lo tih a sawi bawk. Sena MP Arvind Sawant pawhin Shinde kaihhruaite chu a hel zawk a ni a, hei vang hian Sena hruaitu dik tak chu Thackeray a la ni reng a ni, a ti.

Shiv Sena MLA zinga 40-te chu Shinde lamah an ṭang a, Thackeray lamah MLA 15 chauh an awm tawh a ni.