LPG cylinder man tihsan chungchangah Congress-in BJP kaihhruai sorkar an bei

Congress party chuan eirawngbawlna gas, domestic LPG cylinder bur khat man Rs 50-a a tihpun leh chungchangah BJP sorkar laipui chu na taka beiin, prime minister Narendra Modi-a'n ram chhunga thil man a tihsan zel duh lohna chu lantir chhunzawm zel an tum tih an sawi.

Nilaini aṭang khan ram pumah domestic LPG cylinder man hi tihsan a ni a, hei hi May thla hnua a man tihpun a nih ṭum thumna a ni.

Congress president hlui Rahul Gandhi chuan BJP chu economy enkawl fel lo leh thiam loah a puh. Party general secretary Jairam Ramesh pawhin international market-ah crude oil man a tlakhniam zel laiin, sorkar laipui chuan LPG man a tipung thung a ni, tiin a sawi.

Party thupuangtu Ragini Nayak chuan PM Modi rorelna hnuaia petrol leh diesel man a pung zel lo leh, thil man a sang zel a nih loh chuan thil mak tak a nih zawk tur thu a sawi a, "PM Modi-a hlawhtlinna pui ber chu kawng hrang hranga ram mipuite a bum zel hi a ni," tiin a sawi. Congress party chuan press conference hmang chauh ni loin, nawrh huaihawt hmangin ram chhunga thil man sang zel leh, essential commodities-ahte GST a lak tel thar avangin lungawi lohna an lantir zel dawn tih a sawi bawk. "Kawtthler aṭanga Parliament thlengin mipuite tan kan aw kan chhuah dawn a ni," a ti.

Congress thupuangtu Shama Mohamed chuan LPG man chu kum khat chhungin Rs 834 aṭangin Rs 1,053 ah a pung hman tih sawiin, "Ram chhungah ei leh in man a san belh zel leh, hnathawh nei lo an pun chhoh mek laiin hetiang hian an rawn che leh a ni. BJP sorkar hian a ṭhian hausa ho nge, mipui nawlpuite chhanhim a duh zawk?" tiin a ti el zui bawk.