Covid-19 hri kai mek nuai 1.22 ah pung chho leh

India ramah hun eng emaw chen Covid-19 hri lengin ziaawm lam a pan hnuah, tun hnaiah hri kai hmuh chhuah hi an pung chho leh. Nimin khan hri kai mek, active case hi nuai 1.22 an tling chho leh tawh.

Union health ministry-in nimin data a tichhuah tharah Ningani khan ram pumah hri kai hmuh chhuah thar 18,815 awm belh lehin, hri vanga thi mi 38 an awm leh bawk. Nimin zing dar 8 thleng khan India ramah Covid-19 hri kai mek hi 1,22,335 an awm a ni. Hripui vanga thi pawh 5,25,343 an tling tawh bawk.

Daily positivity rate hi 4.96% ah a kai chho leh tawh a, weekly postivity rate pawh 4.09% niin, hri kai zinga thihpui, fatality rate hi 1.21% a ni.

Ministry chuan nimin zing thleng khan Covid vaccine dose vaibelcheh 198.51 sem chhuah a ni tawh tih a tarlang bawk.