Maha Legislature-in Shiv Sena MLA 53-te show notice pe

Maharashtra Legisla­ture Secretary chuan an state-a Shiv Sena MLA 55 zinga 53-te chu show cause notice a pe. An zingah hian Eknath Shinde lamṭang MLA 39 leh Uddhav Thackeray lamṭang 14 an tel.

Eknath Shinde kaihhruaia Shiv Sena MLA tam zawk Nationalist Congress Party (NCP) leh Congress party nena ṭangrual sorkar, Maha Vikas Aghadi (MVA) sorkar an siam an thlawpna hnuk dawk a, Uddhav Thackeray kaihhruai sorkar a tlak phah a ni. Hemi hnu hian Shiv Sena MLA helte leh BJP thawkdun chuan sorkar thar an siam zui a ni.

Shiv Sena-a Shinde lamṭang leh Thackeray lamṭangte hi an la inbei zui zel a, July 3-a Speaker thar thlanna leh, July 4-a Shinde kaihhruai sorkar thar fiahna a neih ṭumah pawh party whip pawisa loah an inpuh rawn a, MLA-te disqualify hi an phut ve ve a ni. Shinde lamṭangin Uddhav Thackeray thlawptu MLA disqualify an phut list-ah hian Thackeray-a fapa, Aaditya Thackeray hming erawh a tel ve lo.

An lamṭang MLA ni lote an chet dan dik loa puha disqualify tura ngenna an thehlut ve ve avangin, Members of Maharashtra Legislative Assembly (disqualification on grounds of defection) rules hnuaiah state legislature principal secretary Rajendra Bhagwat chuan Shiv MLA 53-te hi insawifiah tura hriattirin, notice hi pein ni sarih chhunga chhanna pe turin a hriattir.

Hetih lai hian chief minister Eknath Shinde leh deputy chief minister Devendra Fadnavis-te chuan kar liam ta kartawp khan Delhi-ah kalin, union home minister Amit Shah an hmu a, cabinet minister turte an sawipui. Meeting hi darkar ruk chuang zet an nei. Prime minister Narendra Modi pawh an hmu bawk. Vawiin Supreme Court-in Thackeray lamṭang ten CM atana Shinde ruatna an complaint-na a ngaihtuah hnuah, cabinet minister thar turte hi an puan rin a ni.

Maharashtra ministry-ah hian CM post tiam loin, minister 42 a awm thei a, BJP lam hian 25-28 changin, Shinde lamṭangte hian 14-17 vel an chan rin a ni. BJP hian Revenue, Home, Finance leh Water Resources chu chan an duh nia sawi a ni bawk.

Shinde chuan Thackeray-a'n inthlan ṭhat buatsaih a phutna chu hnawlin, a kaihhruai sorkar chuan majority a nei a, an term pawh an hmang zo ngei dawn tih a sawi. An lam chu Shiv Sena dik tak zawk a ni tiin a sawi nawn leh bawk a ni.