India sorkarin a theih angin Sri Lanka puih zel a tum : Jaishankar

Union external affairs minister S Jaishankar chuan India sorkar chuan sum lama tlachhia, harsatna nasa tak tawk mek Sri Lanka chu a theih anga pui a tum thu a sawi.

Nimina Thiruvananthapuram airport-a chanchinthar lakhawmtute a kawmnaah, Jaishandar chuan India chu Sri Lanka chu a thlawp zel ṭhin a, an buainaah pawh a pui fo tawh a, tun ṭumah pawh an theih anga puih an tum tih a sawi a ni.

"Tunah chuan an harsatna chinfel tumin hma an la mek a, eng angin nge hma an lak dawn kan lo nghah phawt a ngai ani," a ti. Hemi rual hian Sri Lanka economy tlakchhiat avang hian ram danga tlanchhia, raltlan erawh an pun phah nasa lo niin a sawi bawk.

Congress party chuan Sri Lanka mipuite harsatna nasa tak an tawh mekah, India chuan a ṭhenawm ram chu a puih zel an beisei thu nimin khan an sawi. Congress president Sonia Gandhi chuan Indian National Congress chuan Sri Lanka dinhmun chu a ngaihven reng a ni tiin, sum leh pai lama harsatna an tawh mek te, thil man sang leh ei tur, fuel leh nitin mamawh dangte man sang zel chuan an ram mipuite tan phurrit nasa tak a thlen mek a ni, a ti. "Congress party chuan Sri Lanka leh a ram mipuite harsatna an tawh mek chu a tuarpui a, an harsatna tawh mek hi an paltlang theih ngei kan beisei a ni," tiin a sawi.

India sorkar chuan Sri Lanka mipuite chu a theih anga a puih a beisei thu leh, an party chuan ram hrang hrangte hnenah pawh Sri Lanka pui tura an ngen thu a sawi bawk.