Thamna sum laah Delhi CM puh

Delhi Water Minister aṭanga ban, Kapil Mishra chuan Chief Minister Arvind Kejriwal-a chu thamna cheng vaibelchhe hnih laah a puh.

Kapil Mishra chuan Health Minister Satyendar Jain-an CM Kejriwal-a hnenah cheng vaibelchhe hnih a pe lai hi a hmu tih a sawi, a ṭul anih chuan CBI leh Anti-Corruption Bureau hmaah pawh a sawi tur thu a tarlang. Pawisa hi CM official residence-a an inhlan niin a sawi bawk.

Delhi-a rorellai, Aam Aadmi Party chhunga buaina awm chung­chang sawichhuaktu, Kumar Vishwas leh Kapil Mihsra te hi an inpawh ṭha hle nia sawi a ni. Vishwas ang bawkin Mishra hian Delhi Municial election neih zawh taka an chet chhiat chhanah party-in Electronic Voting Machine an puh chu a pawm ve lo a ni. He thu a sawichhuah hnu hian minister a nihna aṭangin ban a ni zui a ni.

Minister hluiin CM a puhna hi chhui chiang turin eptute chuan an phut nghal a, CM chu bang turin an phut bawk.

Hetih lai hian Deputy Chief Minister Manish Sisodi chuan Mishra hi a hnathawh chhiat avang­a minister aṭanga ban a nih thu leh, CM a puhna te chu thu belhchian dawl lo, chhan let tlak a nih loh thu a sawi.