Boko Haram-ten hmeichhe 82 chhuah zalen

Nigeria helpawl, Boko Haram te chuan kum 2014-a zirlai hmeichhia 276 an rukbo zinga mi 82-te chu Inrinni khan an chhuah.

Boko Haram hian an mi mante hi sorkarin Boko Haram helpawl member a mante thlengna atan a chhuah a ni.

Kum 2014 April thla khan helho hian Nigeria hmarchhak lam, Borno state-a Chibok khuaa Government Girls Secondary School zirlai hmeichhia te an rubo a, an zinga 50 chuang chu an tlanchhuak a, hemi hnu nikum December thla khan helpawl hian Red Cross nena inbiakna an neih hnuah an mi man zinga mi 21 hi an lo chhuah tawh a ni.

Helhoin hmeichhia an rukbo zinga a tam ber hi Kristian an ni a, mahse man an nih hnuah Islam sakhuaah inleh tirin, anmahni mantute chu pasalah an neihtir bawk.

Boko Haram-te hian hmeichhia an chhuahte hi sipaite kutah an hlan a, Cameroon ramri bul Banki-a sipai hmunpuiah hruai an ni. Heta aṭang hian Nigeria khawpui, Abuja-ah hruai an ni a, nimin khan President Muhammadu Buhari chuan a lo dawngsawng a ni.

Boko Haram helte hi an ram hmarchhak lama Islam state din tumin kum riat zet sorkar lakah an hel tawh a ni. Hel leh sipaite inbeihna avang hian mi 30,000 chuang an thi tawh a, mi tam tak chu himna zawngin an tlan­chhe tawh bawk. Helho hi hmarchhak lamah an che hluar hle a, mi za tel an rubo tawh a, an zingah hian hmeichhe tleirawl tam tak an tel a ni.

Helho mi mante chhuah an nih theih nan hian sorkar leh helpawl aiawhte chu hun eng emaw chen an inbe tawh a, midang an la hrente pawh chhuah an nih theih nan theihtawp chhuah zel a nih tur thu sorkar aiawhte chuan an sawi.