SC-in Lalu Prasad-a thubuai tinung thar leh

Supreme Court chuan Bihar Chief Minister hlui, Lalu Prasad Yadav-a ranchaw man tihchingpen thubuai chu a tinung thar leh.

Lalu Prasad hi a chief minister laia central aṭanga ranchaw man tur dik lo taka Chaibasa treasury aṭanga lachhuaka inhnamhnawiha puh, mi 45 zingah a tel a ni. Ranchaw man tihchingpen hi cheng vaibelchhe 900 chuang a ni.

Ranchaw man tihchingpen chungchang hi kum 1996 kha haichhuah a ni a, Lalu leh midang 44-te hian bawng chaw leh damdawi man tur tiin treasury aṭang hian dik lo takin cheng vaibelchhe 37.70 an lachhuak a ni.

He thubuaiah hian kum 2013 September thla khan Ranch-a special CBI court chuan Lalu hi thiam loh chantirin kum nga tang tura hrem a lo ni tawh a, jail-ah hun rei vak lo a tang a, mahse bail-a chhuahtir leh a ni. Thiam loh chantir a nih vang hian parliament member a nihna aṭanga disqualify a nih bakah, inthlanah pawh chuh thei loa hrem zui a ni.

Jharkhand High Court chuan kum 2014 khan Lalu Prasad-a thubuai a titawp sak a, a thubuaiah hian thiam loh chantir emaw thiam chantir emaw an nih tawh chuan an thubuai ngai bawk siam sak theih a ni lo ang, a ti. Mahse Central Bureau of Investigation chuan hei hi Supreme Court-ah a appeal a ni. Jutice Arun Kumar leh Amitav Roy awmna bench chuan party hrang hrangte thusawi an ngaithlak hnuah, nimin khan thupek hi a tichhuak a ni.

Court-in thubuai a tihnun thar leh zingah hian Lalu Prasad bakah chief minister hlui Jagannath Mishra leh bureaucrat hlui Sajal Chakraborty-te pawh an tel. Trial court hnenah an thubuai hi thla kua chhunga tifel turin a ti a ni.