HM-in Maoist hel hluarna state CM-te meeting neihpui
Union Home Minister Rajnath Singh chuan nimin khan Maoist hel hluarna state 10-a chief minister-te chu meeting a neihpui a, helpawl beih let dan turte an sawiho a ni.
Singh hian Maoist hel hluarna district hrang hranga superintendent of police leh district magistrate-te chu venhimna leh hmasawnna hna kalpui dan turte ala sawipui leh dawn bawk.
Maoist helho hian pawikhawihna an thlen fo a, April 25 khan Chattisgarh-a Sukma district-ah CRPF patrol lai ambush-in sipai 25 an kaphlum a, he district-ah vek hian March 13 khan security mi leh sa 11 an lo that tawh bawk. Sukma district-a helho pawikhawihna thlen hnu hian Kolkata-a CRPF command headquarters chu Raipur-ah sawn a ni.
Sorkar laipui chuan Maoist hel laka beihpui thlak tura sipai dah belh a tum lo a, mahse meeting-ah hian hmalak dan tur chi dang, Indian Army-te’n District Reserve Guards (DRG) training an pek dan tur te, kawngpui siamnaa duty tura Central Reserve Police Force (CRPF) aia India Reserve Battalion dah dan turte an sawiho.
Home Minister chuan kum sawmhnih chhungin Maoist hel vangin mi 12,000 dawnin nunna an chan tawh niin a sawi a, helpawlte sum hmuhna te chu hrek a ngai a ni, a ti. Helho tawmbuk te dapchhuahna turin unmanned aerial vehicles (UAVs) pawh hman a ni dawn niin minister chuan a sawi.
Nimina meeting neihah hian chief minister-te chuan an state chhunga security chungchanga presentation an pe a, union minister dangte nen an inkawm nghal bawk.
Meeting-ah hian Chhattisgarh, Jharkhand, Odisha, West Bengal, Bihar, Maharashtra, Telangana, Uttar Pradesh, Madhya Pradesh leh Andhra Pradesh chief minister-te an tel a ni.