Kum 2023-ah mihring tam lamah India-in China pel dawn : UN Report

United Nations chuan kum 2023-ah India-in mihring tam lamah China ram pelin, khawvela mihring tamna ber ram a ni tawh dawn tih a sawi.

Nimina United Nations Department of Economic and Social Affairs, Population Division-in World Population Day puala World Population Prospects 2022 a tihchhuahah, nakkuym November 5-ah chuan khawvel puma mihring awm chu tluklehdingawn riat tling turin an chhut a ni.

Mihring punna hi a tlem sawt hle a, kum 2020-ah phei chuan a punna hi 1% a tling pha lo. UN in a chhut lawk dan chuan, kum 2020-ah khawvel puma mihring awm zat chu tluklehdingawn 8.5 vel tlingin, kum 2050-ah tld 9.7 vel tling turin a chhut. Kum 2080 chho ah tld 10.4 vel tlingin, kum 2100 thleng hemi level-ah hian a awm dawn niin an tarlang.

Report chuan kum 2023 chhungin India in mihring tam lamah China a pel thei dawn tih a tarlang. Kum 2022 chhung khawvela mihring tamna bial, region pahnih chu Eastern leh South-Eastern Asia niin mi tld 2.3 an awm tling a, heihi khawvel puma mihring awm zat aṭanga 29% a tling. Central leh South Asia region-ah mi tld 2.1 an awm bawk.

China leh India hi mihring tamna ber pahnih niin, India rama mihring awm zat hi tld 1.412 niin, China-ah tld 1.426 an awm a ni. India rama mihring an pun belh zel laiin China erawh a tlahniam zel thung a, hei vang hian kum 2050-ah chuan India ramah mihring tld 1.668 awm tura chhut a nih laiin, China-ah chuan tld 1.317-ah an tla thla dawn nia chhut a ni.