SC-in court thupek zah loha puhin thla 4 tang turin Vijay Mallya hrem

Supreme Court chuan sumdawng lian, ram danga himna zawnga tlanchhe mek Vijay Mallya chu kum 2017-a court thupek a zawm loh avangin thla li jail tang tur leh, Rs 2,000 chawi turin a ti.

Vijay Mallya hian kum 2017 khan court thupek bawhchhiain a fate bank account-ah USD mtd 40 a transfer a ni. Supreme Court-in sum chawi tura a tih hi kar li chhung ngei court legal service authority hnenah pe turin a ti a, hemi chhunga a pek hman loh chuan a jail tan hun hi thla hnih belh a ni ang.

Court chuan Vijya Mallya-a'n a fate hnena USD mtd 40 a thawn chu dan kalh leh pawm loh tur a ni tiin, he pawisa dawngtute hnenah pawh an pawisa dawn leh a pung 8% chu kar li chhunga recovery officer hnenah pe turin a ti. Sum hi pek kir a nih loh chuan, Vijay Mallya thil neihte hrek sak a ni dawn tih a sawi. "Pawisa hi pek kir a nih loh chuan, recovery officer chuan hemi hu sum hmuh lehna turin a ṭul angin hma a la thei dawn a, sorkar laipui leh agency hrang hrang pawhin an pui dawn a ni," a ti.

State Bank of India (SBI) kaihhruai bank intelkhawmte chuan Vijay Mallya chunga action la tur leh, ram pawm lama firm Diageo aṭanga a sum dawn USD mtd 40 chu deposit tir tura hriattir turin court hi an ngen a ni. Bank ho chuan Vijay Mallya hian a sum dawn hi zepin, a dawn hnua a fapa Siddharht Mallya leh a fanute - Leanna Mallya leh Tanya Mallya-te account ah court thupek kalhin a dahsak niin an sawi.

Vijay Mallya hi bank aṭanga a sum puk, Rs vbc 9,000 chuang a ba a, a Kingfisher Airlines pawh a tihtawp phah tawh bawk. Bank leiba tam tak a neih hnuah, kum 2016 March thla khan UK-ah kalin, tun thlengin a la awm a ni.