AIADMK-in party aṭangin OPS hnawtchhuak

Tamil Nadu-a eptu party, All India Anna Dravida Munnetra Kazhagam (AIADMK) General Council meet chuan an party treasurer O Panneerselvam chu party member a nihna aṭagnin a hnawtchhuak.

Nimina Chennai-a General Council meet-ah hian party senior leader Natham R Viswanathn chuan Panneerselvam leh a thlawptute hnawtchhuahna tur resolution pu lutin, hei hi member-ten lungrual takin an pawm a ni.

Resolution-ah hian Panneerselvam chu rorellai, DMK lam thlawp leh DMK party hruaitute nena inzawmna ṭha tak neia puh a ni a, AIADMK chhiatna turin a thawk niin an puh a ni. OPS chu party thuthlung leh duhdan kalha chein, June 23 General Council meet neih pawh dang turin police-te pawh a pun hial niin an sawi. AIADMK chuan Panneerselvam chuan ama ṭanghma chauh hai, a mimal hlawkna tur chauh buaipuiah an puh.

Paneerselvam hi party treasurer a nihna aṭana ban a nih bakah, party member a nihna pawh tihtawp sak a ni bawk. Ani bakah amah thlawptu MLA pahnih - R Vaithilingam leh PH Manoj Pandian bakah MLA hlui JCD Prabakar-te pawh party aṭangin hnawhchhuah an ni bawk.

Paneerselvam chuan party thuchhuah hi chhang let nghalin, party worker vaibelchhe 1.5-ten Coordinator atan an thlang a, an party hruaitu Edappady K Palaniswami emaw, KP Munusamy emaw ten party aṭanga hnawtchhuak ngawt turin dikna an nei lo tih a sawi. Heng hruaitu pahnihte hi AIADMK aṭangin a hnawtchhuak tih a sawi ve thung. Party chhunga dik taka rorelna kalpui a nih theihna turin court-ah amah thlawptute an kal dawn tih a sawi bawk a ni.