SC-in thla 6 tang turin Justice CS Karnan hrem

Supreme Court chuan Calcutta High Court judge Justice CS Karnan chu court zah lohah puhin, thla ruk chhung jail tang turina hrem.

Karnan hi judge ṭanglai zingah jail tang tura Supreme Court-in a hrem hmasak ber a ni. SC chuan print leh electronic media-te chu Justice Karnan-a thusawi leh thupekte chhuah chhawng tawh lo turin a tinghal bawk.

Court chuan a thupek angin, Justice Karnan chu man nghal turin a ti a ni. Justice Karnan hian Supreme Court judge eng emaw zat chu eiruah a puh a, Chief Jutice of India JS Khahar leh Supreme Court judge pasarih-te chu kum nga tang turin thupek alo tichhuak tawh bawk. A chetdan vang hian Karnan hi judiciary system zah loha puhin thubuai siamsak a ni.

Justice Karnan chuan SC chuan a lakah thupek siam turin thunehna a nei lo tioh sawiin, inpek a tum lo tih a sawi. Kumin January thla khan Karnan hian Prime Minister Narendra Modi-a hnenah lehkha thawnin, judge eiru nia a puh mi 20 hming a ziak lang a, heng mite hi Indian Judiciary-a eirukna tibo tura chhui chiang turin a phut tih a tarlang.

Supreme Court chuan Karnan hi judiciary zah lohah puhin hriattirna a pe a, court-a inlan tura a kohnaah a kal duh loh vangin March 10 khan a lakah bailable warrant a tichhuak a ni. Mahse hemi hnu hian Justice Karnan hian CJI bakah SC judge pasarihte chu kum nga jail tang tura hremna tichhuak ve leh a ni.

March 31 khan Supreme Court judge panga awmna bench hmaah Karnan hi a inlan a, mahse April 13 khan SC/ST Act palzutah judge-te hi puh lehin a hmaa inlan turin a ko leh a ni. Hemi hnu hian CJI leh judge parukte chu India ram an chhuahsan phalsak lo turin New Delhi-a Air Control Authority a hriattir bawk.

May 4 khan Supreme Court chuan Karnan hi medical test nei turin a ti leh a, mahse Karnan chuan he thupek hi a zawm duh loh mai bakah, Delhi Police-te hnenah judge pasarihte chu psychiatric test neihtir turin a ti ve leh thung a ni.