Delhi Assembly-ah EVM khawih chingpen dan entir

Delhi-a rorellai, Aam Aadmi Party (AAP) chuan kumina state ṭhen­khata assembly inthlan leh Delhi civil body inthlana vote thlakna electronic voting machine (EVM) chu khawihchingpen niin an sawi a, hei hi an party chet chhiat chhanah an puh bawk.

Nimin khan Chief Minister Arvind Kerjiwal-a chuan special assembly koin, EVM khawih chingpen a nih theih dan hi an entir a ni. Assembly-ah hian AAP MLA Saurabh Bharadwaj chuan EVM-ah hian party hrang hrang tana vote pahnih theuh thlak theih dan a entir a, engineering graduate pangngai pawhin ni 10-15 chhung vel lekin EVM chu an siam danglam thei niin a sawi.

AAP leh eptu party ṭhenkhat chuan EVM hi khawih chingpen theih a ni a, hei vang hian vote thlakna atan paper ballot hmang leh turin Election Commission-ah pawh ngenna an lo theh­lut tawh. Mahse Commission chuan EVM hi khawih danglam theih loh a nih thu leh, a rintlak thu a sawi thung.