AAP minister aṭanga banin chaw ngheia nawrh huaihawt

Delhi Chief Minister Arvind Kejriwal-a’n minister atanga a ban, Kapil Mishra chuan AAP sorkar leh CM chu eiruah puha na taka a beih hnuah, AAP hruaitute chu ramdanga an zin dan kimchang tarlang tura phutin nimin zing aṭang khan chawngheiin a nawr.

Mishra hi Delhi Civil Lines-a a chenna hmunah a nuar a, a nawrhna hmunah hian Mahatma Gandhi thalak dahin a thiltih chu muanawm taka lungawi lohna lantirna a nih thu a sawi.

Kapil Mishra hian CM Kejriwal-a chu thamna laah a puh a, hemi hnu hian AAP aṭangin hnawhchhuah a ni. Mishra chuan, AAP hruaitu panga-te chu eiruknaa inhnamhnawihah puhin chhui chian a phut a, an zingah hian minister Satyendar Jain leh senior leader Ashish Khetan leh Sanjay Singh-te pawh an tel. Party hruaitu panga-te hi kum hnih kalta chhunga ram pawn lam an thlawh dan chanchin kimchang puangzar turin a phut a, heta ṭang hial thil awmdan chu chiang taka a lan mai tur thu a sawi a ni. Kejriwal-a’n a puanchhuah hma chuan tui chauh ringa a awm tur thu a sawi bawk.

Mishra chuan ram pawn lam aṭanga thaha vauna phone call pawh a dawng tih a sawi. Thawhlehni khan Kapil Mishra hi Central Bureau of Investigation (CBI) hnenah kalin, AAP leh Kejriwal te a puhna finfiahna document nia a sawi chu a pe a ni. A document thehluh zingah hian Kejriwal-a’n minister Satyendar Jain hnen aṭanga thamna, cheng vaibelchhe hnih a dawng ngei tih finfiahna pawh a awm niin a sawi.