Eptuten Agnipath scheme sût a nih loh pawhin Parliamentary committee ennawn tir turin phût

Eptu party-te chuan sorkar laipuiin sipai lakna tur dan thar a duan, Agnipath scheme chu sût turin an phût a, sût a nih lohin Parliamentary committee hnenah ennawn leh tura thawn turin an phut.

Agnipath Scheme hian sawisel a hlawh hle a, duh lohna lantirin ramchhung hmun hrang hrangah pawh nawrh huaihawt a ni. Hetih lai hian sorkar laipui chuan he scheme hi kaltlangpui a ni dawn tih a sawi thung. Parliament Monsoon Session lo awm turah pawh hemi chungchang hi an buaipui chho hle rin a ni.

Nimina defence minister Rajnath Singh hoin sorkar leh eptu lamte chuan Agnipath scheme hi an sawiho a, meeting-ah hian party hrang hrang aṭangin MP 12 an tel a, an zingah hian BJP MP pali an tel. Anni bakah army chief leh ministry of defence-a official-te an tel bawk.

Eptu lam chuan military recruitment scheme thar hi an siamṭhat a ngai hle tih sawiin, sorkar laipui chuan a sut lo anih pawhin ennawn a ngai a ni, an ti.

Rajya Sabha-a Congress MP Shaktisinh Gohil chuan, "Democracy ramah sorkarin policy thlak danglam lian tak a neih dawn chuan experiment anga tih mai tur a ni lo. A zau thei ang berin midang a rawn hmasa tur a ni. Agnipath scheme hman hi armed force-te lam tih pawh a ni lo. Ram pumah he scheme sawiselna a nasa a, sût leh turin sorkar kan phût a ni," a ti.

TMC MP Saugata Roy pawhin sorkar laipui chuan he scheme chungchanga an zawhna hrang hrangte a chhang thei lo tih sawiin, hei vang hian Rajnath Singh hnenah mi tam zawk rawn tur leh, Parliament Standing Committee for Defence hnenah he scheme hi ennawn tura thawn tura ngenna an thehluh thu meeting zawh hnuah a sawi ve bawk.

Rajnath Singh hnena ngenna thehluhah hian Congress MP Shaktisinh Gohil leh Rajni Patil, TMC MP Professor Saugata Roy leh Sudip Bandopadhyay, NCP MP Spriya Sule leh RJD MP AD Singh-ten hming an ziak a ni.