President thlanna tur atana hmanruate thawnchhuak ṭan

Election Commission of India chuan July 18-a India President thar thlanna neih tur atana hmanrua, ballot paper leh pen bakah ballot box-te chu nimin khan a thawnchhuak ṭan.

Heng hmanruate hi vote thlakna tur, state hrang hranga legislative assembly-ah thawn an ni ang. Legislative assembly-te bakah Parliament House-ah pawh vote hi thlak a ni dawn a ni.

ECI chuan thlawh­theihna service lamah harsatna te awm palh thei a nih avangin inthlanna hmanruate hi thawnchhuah hma a nih thu a sawi.

President ṭanglai, Ram Nath Kovind term hi July 24-ah a tawp dawn a, amah thlaktu tur hi July 18-ah Parliament member leh state legislative assembly member-te awmna, electoral college-in an thlang dawn a ni. Electoral college-ah hian MP 776 leh MLA 4,033 an awm mek.

Inthlan neih turah hian rorellai, BJP kaihhruai National Democratic Alliance (NDA) chuan candidate atan Draupadi Murmu a ruat a, eptu party ṭhenkhatin joint candidate atan Yaswant Sinha an ruat bawk.

Vice President thlanna turah candidate 4 awm tawh
August 6 hian India Vice President thlan a ni dawn bawk a, he inthlana chuh tumte tan July 5 aṭang khan nomination paper thehluh theih niin, July 19 thleng hawn a ni.

Nimin thleng khan inthlana chuh tum candidate panga-in nomination paper an thehlut tawh a, mahse an zinga pakhat chu hnawl a ni. Midang palite nomination thehluh hi July 20-ah ennawn a ni ang. July 20 thleng hian inhnukdawk duh tan hun hawn a ni bawk.

Candidate-te nomina­tion pawmsak tur hian proposer-ah MP 20 leh seconder-ah MP dang 20 thlawpna an neih a ngai. Mi pakhat hian nomination paper hi pali thleng a thehlut thei a, security deposit-ah Rs 15,000 a dah a ngai bawk a ni.

Vice President ṭanglai M Venkaiah Naidu term hi August 10-ah a tawp dawn a, a thlaktu atana thlan hi August 11-ah lakluh nghal a ni dawn a ni.

Nimin thlenga nomination thehlut tawh mi panga-te chu -
1) K Padmarajan, Tamil Nadu
2) Praeshumar Nanubhai Mulani, Gujarat
3) Hosmath Vijayanand, Karnataka
4) Naidugari Rajasekhar Srimukhalingam, Andhra Pradesh
5) Anand Singh Khushwaha, Madhya Pradesh.