AAP worker-te EC office kawtah pungkhawm

Aadm Admi Party (AAP) chuan ballot paper emaw, Voter-Verifiable Paper Audit Trail (VVPAT) nena thlunzawm electronic voting machines (EVM) emaw chauh inthlanaah hman phutin, nimin khan party worker eng emaw zat chu Election Commission (EC) headquarters kawtah an pungkhawm.

EC kawta pungkhawm zing­ah hian AAP MLA eng emaw zat bakah, Delhi convener atana ruat thar Gopal Rai pawh a tel.

AAP hian tunhnaia assemby inthlan neih leh, Delhi civil body inthlanah vote thlakna atana hman EVM-te chu khawih chingpen niin an puh a ni. AAP bakah eptu party dangte pawhin vote thlakna atan ballot paper hman an phut thu an sawi tawh bawk.

EC office kawt pungkhawm AAP worker-te chuan EVM khawih chingpen nia sawite chu enfiah vat tura an phut thu an sawi a, Maharashtra, Punjab, Uttar Pradesh leh Uttarakhand-ahte EVM khawih chingpen nia puhna hi a awm a ni, an ti.

Thawhlehni khan Delhi Chief Minister Arvind Kejriwal-a chuan special assembly session koin, EVM khawih chingpen theih a nih dante AAP MLA Saurabh Bharadwaj chuan a takin a entir a ni.

Hetih lai hian EC chuan EVM hi khawih danglam theih a ni lo tih sawiin, hemi finfiahna atan hian tun thla tawp lamah a duh apiang tan khawih danglam tuma an beih chhinna tur hun siam a tum a ni.