Covid-19 kai mek aiin enkawl dam Mi nuai chuangin an tam tawh zawk

India ramah Covid-19 hripui lengin ziaawm lam a pan thei lo a, hri kai hmuh chhuah thar nasa takin pung mah se enkawl dam lamah pawh hmasawnna a nasa hle. 

Nimin thleng khan ramchhung hmun hrang hrangah hripui leng kai 5,28,859 an awm tawh a, chung zinga 3,09,713 chu enkawl dam tawh niin 2,03,051-in an la kai mek a, mi 16,095 chuan an thihpui tawh bawk. Vei mek ai hian enkawl dam tawh hi 1,06,662-in an tam zawk. 

Nimina Ministy of Health and Family Welfare report chuan darkar 24 chhungin hri kai hmuh chhuah thar 19,906 an awm tih sawiin ni khata hri kai hmuh chhuah thar zat hi a pung nasa hle a, sing hnih kan hnaih tawh hle. 

Enkawl dam 13,832 awmin mi 410-in an thihpui leh bawk a ni. Enkawl dam tawh rate hi a san belh zel bawk a, 58.56% a tling tawh.

Indian Council of Medical Research (ICMR) chuan Inrinni khan Covid-19 sample 2,31,095 an test tih tarlangin hri len ṭantirh aṭang khan sample 82,27,802 an test tawh.

Sample test-na atan hian sorkar laboratory 749 leh private laboratory 287 ICMR hian a pawmpui tawh a ni.

Health Ministry chuan Covid-19 en­kawlna bik damdawi-in ram pumah 1055 a awm tawh tih sawiin hengah hian isolation bed 1,77,000 a awm tih a sawi. ICU khum 23,000 awmin oxygen pek nghal theihna khum 78,000 a awm bawk. 

Ministry chuan COVID Health Centres 1400 a awm tih an sawi bawk a, chung zawng zawng chu hman vek a nih thu an tarlang bawk a ni. 

Covid-19 dona atan hian ram pumah COVID Care Centres 9,000 aia tam awmin hengah hian khum 1,34,000 a awm a, centre hrang hrangah hian N95 hmaituamna nuai 187 aia tam sem tawhin PPE nuai 117 chuang sorkar chuan a sem tawh bawk.