India chu chak takin a awm zel dawn: PM Modi
Prime minister Narendra Modi chuan Pathiannia Mann Ki Baat kaltlanga mipuite hnena thuchah a sawinaah, ramri chungchanga India leh China buainaah India chu chak taka a awm tur thu a sawi.
"Kan ram Ladakh-a min tibuaitute chu kan chhang let zel dawn a, kan huaisenna chuan inpekna min neih tir a, kan hmelmate kan inhneh tir lo ang. Ramria intihbuainaa kan sipai nunna chante thinlung takin kan tawrhpui a, an huaisenna chu India chakna a ni," tiin Modi chuan a sawi bawk
June 15-a Ladakh hmarchhak lam, Galwan Valley-a India leh China sipaite silai tel loa an intihbuai khan India sipai 20 an thi a, heng mite hi Modi chuan eng tikah mah kan theihnghilh tawh lo ang, a ti. Anni vanga India chu him an nih thu leh, an huaisenna chu hriat reng a nih tawh tur thu PM chuan a sawi.
Mann Ki Baat programme-a a thu sawinaah hian Modi chuan inṭhianṭhat dan a hriat thu a sawi a, chutih rualin India inpumkhatna tichhe thei zawnga hmalate hnenah a rul tawka chhan let dan a thiam thu a sawi.
Mann Ki Baat-a
PM thusawi tlangpuite
4 Kum chanve kan thleng tawh a, mipui nawlpuiina kan sawi tam ber chu kumin hi engtikah nge a zawh ang aw, tih hi a ni. India chanchin hlui kan thlir let chuan harsatna hrang hrang kan lo paltlang tawh leh kan hneh dan kan hmu ang.
4 Khawvel chuan India-in a ram a ven zia a hmu a, a ram mipuite inpumkhatna pawh a hmu a ni. Ladakh-a kan chunga dik lo taka chete pawh a chhanna kan pe a ni.
4 India chuan a ram tana nunna hlantute a zah em em a, anni vanga India chu him a ni tih a hai lo a, an huaisenna chu hriatreng a ni tawh ang.
4 India thil tum pawimawh tak pakhat zinga mi chu chak taka awm a, midang rinchhan ngai loa rama siam a ni a, hei hi ram tana martarte zahna kan lantirna tur pawimawh tak a ni.
4 Engmah hi mipuite tello chuan a hlawhtling thei lo a, kan thawhhona avangin 'Atmanirbhar Bharat Abhiyan' (Self-Reliant India Mission) kan tihlawhtling thei a ni.
4 Kan hnam zia leh nunphungte chuan min kaihhruai zel a, harsatna kan tawh ṭhinte kan lo hneh tawh angin, tun huna harsatna hrang hrang kan tawh mekte hi kan hneh zel dawn a ni.