EC-in party 55 aiawhte meeting neihpui

Election Commission of India chuan vote thlakna atana hman, electronic voting machne (EVM) a rintlak zia entirna atan a, a duhten khawih danglam tuma an beih chhin­na hun, hacking challenge siam a tum chungchangah nimin khan political party 55 aiawhte a kawm.

EC chuan national party pasarih leh state party 48 aiawhte chu meeting neihpuiin, EVM khawih danglam theih a nih loh chung­chang a sawipui. Tunhnaia party 13 hruaitute chuan EC official-te hi hmuin, EVM an rintawk tawh loh thu leh, inthlana vote thlakna atana hman chhunzawm a nih dawn chuan VVPAT (voter-verified paper audit trail) nena thlunzawm vek a nih loh chuan, paper ballot hman an duh zawk thu an thlen a ni.

Meeting-ah hian EC-in hacking challenge a siam tum chungchangte sawiin a ni tur pawh an ruat nghal a ni.

Party ṭhenkhat chuan Uttar Pradesh assembly inthlan neiha EVM hmante kha enfiah an phut bawk.

EC chuan political party hrang hrang aiawhte hi thamna latu candidate diqualify chungchang te, thamna peknaa inhnamhnawihte bail theih loha manna tur siam chungchangte a sawipui bawk.

Commission-in meeting a koh hma hian Delhi-a rorellai, Aam Aadmi Party chuan Delhi assembly special session koin, EVM khawih danglam theih a nih dante an lantir thung. Mahse, hei hi EC chuan a pawm lo a, assembly-a an entir chu ECI-EVM ni loin, a ang tak khawl dang a ni zawk niin a sawi.