Politics-a inbeihna tihtawp a hun : Shiv Sena
Right wing political party Shiv Sena chuan ramri chungchanga buainaah BJP leh Congress chu politics hmanga inpuh tawn chhen loin, China beihna kawnga inthurual turin a ti.
BJP chuan Galwan Valley-ah China-in hmun rawn khuarin thil an siam thu a tarlang a, hetiang an rawn tih ngamna chu sorkar hmasa khan thamna pawisa an lak vang a ni, tiin Congress chu a puh a ni.
Shiv Sena chuan party pahnihte politics hmanga an inpuhtawnna chu titawp turin a ti a, "China chuan Galwan Valley-ah hmun thar a sa mek a, an sipaite pawh Arunachal leh Sikkim an rawn lut a ni. Hei vang hian politics-a inhuatna hi dahṭhat a ngai a, China bei let tur hian thawhho a ngai tawh zawk a ni," tiin Shiv Sena chanchinbu Saamana-a editorial-ah an tarlang.
China chuan India rilru tibuai zawngin hma a la reng a, indo tak tak hi a duh lo a, mahse India chu ramriah indo hmabak ang maia awm tir reng chu a tum zawk a ni, a ti.