Assembly leh Lok Sabha inthlanah VVPAT hmang tel dawn

Election Commission of India (ECI) chuan state assembly leh Lok Sabha inthlanah vote thlakna atan Voter-Verified Paper Audil Trail (VVPAT) hman tel zel a ni tawh dawn tih a sawi.

Kar kalta Zirtawpni kan ECI chuan inthlana vote thlakna atana hman, Electronic Voting Machine (EVM) chungchangah political party 42 aiawhte chu meeting a neihpui a, he hunah hian EVM hi VVPAT nen thlunzawm a ni zel tawh dawn tih a puang a ni. Commission chuan EVM-a vote lang zat leh VVPAT-a lehkhaa lo lang chu inthlan a piangin polling booth ruat bik eng emaw zatah en mil ṭhin a nih tur thu a sawi bawk.

ECI chuan thutlukna a siam ang­in, kumin kumtawp lama Gujarat leh Himachal Pradesh assembly inthlan neih turah pawh EVM zawng zawng chu VVPAT nen thlunzawm a tum nia sawi a ni bawk.

Hetih lai hian eptu party hrang hrangten vote thlakna atan EVM an rinngam tawh loh thu leh, khawih chingpen theih nia an sawi chu Commission chuan a pawm lo. EVM chu khawih danglam theih a ni lo tiin, a duh apiang tan khawih danglam tuma beihna hun, hacking challenge pawh a siam dawn a, a hun tur erawh a la puang lo.

Meeting-ah BJP tih loh political party hrang hrangte chuan EVM chu a rintlak tawk tawh lo nia an ngaih thu an sawi. National party pasarih leh state party 35-te chuan EVM leh VVPAT thlunzawm chu an thlawp a, hetih lai hian Trinamool Congress, RJD, BSP, CPI, PMK leh J&K National Panthers Party chuan paper ballot hman an duh zawk thung.

Union cabinet chuan EVM nena thlunzawm tur, VVPAT khawl lei hi a remti tawh a, khawl lei ngai zat hi 16,15,100 vel a ni a, pakhat man hi Rs 19,650 vela chhut a ni. VVPAT hi EVM nena thlunzawm a nih chuan, vote thlak chu printer invuahsaah chuan alo print chhuak zel dawn a, vote thlak chu a dik ngei em tih awlsam takin a hriat theih dawn a ni.