LoC bula school-te tiam chin awm loin khar

Pakistan sipaiten ramri-a inkahhai thuthlung puan tawh palzuta Indian post te an beih chhunzawm fo avangin, ramri Line of Control (LoC) dunga school awmte chu tiam chin awm loa khar an ni.

Jammu and Kashmir Deputy Commissioner Shahid Choudhary chuan Inrinni zing aṭanga Majakote sector-a LoC-ah Pakistan sipaiten silai an hmehpuah leh hnuin he thupek hi a tichhuak a ni. Hemi hma hian Nowshera leh Qila Darhal-ah pawh silai hmehpuah alo ni tawh bawk.

Nimin zing khan Pakistan sipaite chuan Rajouri sector-a LoC-ah India lam hawiin silai an hmetpuak leh a, in eng emaw zat kapchhiain hei vang hian ramri bula cheng mi 1,000 dawn chu hmun him lamah sawnchhuah an ni. Pakistan sipaite hi India sipaite chuan an kap let ve nghal a ni.

Rajouri deputy commissioner Shahid Iqbal Choudgary chuan ramri-a inkahna thleng hian thingtlang khaw pasarih a nghawng tih a sawi a, Nowshera sector-a school 51, Manjakote leh Doongi zone-a school 36-te chu tiamchin awm loa khar niin, hei hian zirlai 4,600 vel a nghawng dawn niin a sawi.

Chief Minister Mehbooba Mufti-i chuan Rajouri sector hi tlawhin, thil awmdan a enfiah dawn a, deputy CM Dr Nirmal Kumar Singh-a’n a ṭawiawm ang.