Parliament building-a national emblem siamin sawizui a hlawh

Prime minister Narendra Modi-a'n Parliament building thar chunga national emblem a tlangzarh chuan sawizui a hlawh hle.

Eptu party-te chuan Executive head, Prime Minister-in national emblem a tlangzarhna chhan hi an zawt a, hemi rual hian emblem hi tihdanglam nia sawiin, hei hi ram hmuhsitna a ni, an ti. Mahse he milim designer-te chuan siam danglam a ni lo niin an sawi ve thung.

Rashtriya Janata Dal hruaitu, Lalu Prasad Yadav chuan national emblem-a sakeibakneite chu zaidam hmel tak an nih ṭhin laiin, PM-in a tlangzarh taka an lim siam tharah hi chuan mihring ei tur zawng hmel an pu a ni, a ti. Symbol-te hian mihring ngaihtuahna an pholang ṭhin a ni, a ti zui bawk.

Rajya Sabha-a Trinamool Congress MP Jawhar Sircar pawhin he lim tlangzarh tak hi national symbol hmuhsitna, Ashoka Lion ropui tak hmuhsitna a ni, a ti. National emblem tlangzarh thar chu Modi-a version - midang ngur a, thil ṭula midang dodal a, inlavung tak a ni, a ti. Thlak danglam leh nghal turin a phut tih a sawi.

TMC MP Mahua Moitra pawhin a twitter-ah national emblem, a original leh PM Modi-a'n a tlangzarh tak thlalak hi a dah kawp bawk.

Emblem designer, Sunil Deoare leh Romiel Moses-te chuan thlak danglam an nei lo niin an sawi a, "Engkim uluk takin kan siam vek a ni. Heng sakeibakneite nihna pawh hi a ngai ren a, tlemte lo in ang lo deuh chu a awm maithei. Lim lian tham tak a ni a, hnuai lam aṭanga thlirin hmuh dan a dik lo pawh a ni ve thei a ni," an ti a, an thil siam chu an chhuang hle tih an sawi.

National emblem hi dar-a siam a ni a, kg 9,500-a rit, meter 6.5-a sang a ni. A dina steel structure hi kg 6,500-a rit a ni bawk.