SC-in Agnipath Scheme chungchanga petition lutte a ngaihtuah dawn

Supreme Court chuan sorkar laipuiin short-term recruitment hmanga sipai lak dan tur a duan thar, Agnipath scheme duh lotuten petition an thehluh chu July 15-ah a ngaihtuah dawn.

Agnipath scheme chungchanga petition lutte hi justice DY Chandrachud leh AS Bopanna awmna bench chuan a ngaihtuah dawn a ni.

Sorkar laipuiin June thlaa Agnipath scheme a tlangzarh hnuah, ram chhung hmun hrang hranga duh lohna lantir a ni a, state ṭhenkhatah phei chuan tharum thawhna a thlen phah hial. Supreme Court-ah he scheme duh lotuten petition eng emaw zawt an thehlut.

Supreme Court-a petition thehluttu zingah hian advocate Harsh Ajay pawh telin, sorkar laipui chu Agnipath recruitment scheme hi ngaihtuah ṭha tur leh, he scheme hi kalpui rih lo turin a ngen. Advocate ML Shawrma chuan he scheme kalpuina tura sorkar laipuiin hriattirna a tihchhuah chu dan kalh, constitution kalh a ni tiin sut leh turin a phut bawk.

Delhi High Court-ah pawh Agnipath Scheme khinna hi eng emaw zat thehluh a ni bawk a, High Court hian heng petition-te hi July 20-ah ngaihtuah a tum ve bawk.