SC-in Justice Karnan ngenna hnawlsak

Justice CS Karnan-a’n amah manna tur thupek tihchhuah tawh sut leh tura a ngenan chu Supreme Court chuan a hnawlsak.

Calcutta High Court judge, Justice Karnan hi court zahloha puhin Supreme Court-a judge pasarih awmna constitution bench chuan man nghal tur leh, thla ruk chhung lung-in tantir turin May 9 khan thupek a lo tichhuak tawh a ni. Mahse cour thupek tihchhuah hma hian Karnan hian Kolkota aṭangin Chennai a pan a, man tura kal West Bengal police-te chuan an hmu zo lo a ni. Andhra Pradesh-a Srikalahasti temple tlawh turin a kal nia sawi a nih avangin an umzui leh a, mahse hetah hian an hmu zo chuang lo. Karnan hi tun tlengin a awmna tak hriat ala ni lo a, mahse a ukil chuan Chennai-ah a awm niin a sawi.

Justice Karnan hian Supreme Court leh High Court judge 20-te hming chu puangin eiruah a lo puh tawh a, Prime Minister Narendra Modi leh midang eng emaw zat hnenah lehkha pein, judge eirua a puhte hi chhui chiang turin a phut a ni. Constitution bench-in a chungthu a ngaihtuah hma hian Chief Justice of India Khehar leh Supreme Court judge parukte chu SC/ST act hnuaiah kum nga lung-in tang turin an chungthu a lo rel sak bawk.

Supreme Court chuan Justice Karnan man tura thupek a tihchhuah bakah, media mite chu Karnan-a thupek leh thuchhuahte thehdarh lo turin a ti bawk.