Ni li cham turin Palestinian president lo zin

Palestinian President Mahmoud Abbas chuan ni li cham turin Pathianni zan khan Delhi a rawn thleng.

India rama a cham chhungin Abbas hian Prime Minister Narendra Modi kawmin, inzawmna ṭha zawk siam dan kawng a sawipui dawn a ni. Abbas hian India a rawn tlawh ṭum thumna a ni.

Abbas hian PM bakah president, foreign minister leh mi pawimawh dangte a kawm dawn a, Noida-a Center for Development of Advanced Computing (C-DAC) a tlawh bawk ang. Ram pahnihten technolgy lama thawhdunna ṭha zawk an neih theih dante an ngaihtuah dawn a ni. New Delhi-a India Islamic Cultural Centre-ah thu a sawi bawk ang.

Abbas leh Modi hian ram pahnihte thawhdunna tur inremna eng emaw zat an ziak nghal dawn a ni.

External Affairs Ministry thupuangtu Gopal Baglay chuan India leh Palestinie chu hmanlai aṭang tawha inṭhianṭha tak a nih thu sawiin, India chuan Palestine-a hmasawnna hna thawh hrang hrang chu a theihtawpin a thlawp zel a, technical leh financial lamah pawh a theih angin a pui a ni, a ti.