CBI-in Chidambaram leh a fapa in dapsak

Central Bureau of Investigation (CBI) chuan nimin khan Union minister hlui P Chidambaram leh a fapa, Karti Chidambaram-te chenna in an dap sak.

CBI hian Delhi, Mumbai, Gurgram leh Chennai-a hmun 14 an dap a ni. Mumbai-a Peter Mukerjea in pawh dap tel a ni.

INX media tana kum 2007-2008-a Foreign Investment Promotion Board (FIPB) approval pek chungchangah Karti Chidambaram-a lakah hian FIR thehluh a ni. INX media hi Peter Mukerjia leh a nupui Indrani te ta a ni. INX media director Indrani Mukerjea, Peter Mukerjea, Karti Chidambaram, Chess Mangament Services (Karti-a company) kaltlangin INX media lakah hian thubuai ziahluh a ni a, Advantage Strategic Consulting Limited Director Padma Vishawanathan kaltlangin thubuai ziahluh a ni bawk.

Chidambaram chuan sorkar chuan a aw chhuah thei lo tura hrekbeh a tum niin a sawi.

“Sorkar chuan CBI leh agency dangte hmangin kei, ka fapa leh ka ṭhiante min bei a ni. Sorkar chuan min hrekbeh a, engmah sawi leh ziak thei lo tura min dan a tum a, hei hi eptu hruaitu dang­te, journalist, columnist, NGO leh civil society organization dangte chungah pawh a ti a ni. Mahse ka ṭawng chhuak zel ang” a ti.

Congress hruaitu chuan FIPB chungchang chu dan ang taka kalpui vek a ni tih a sawi a. FIPB approval chu mi dang tam tak pawh pek an ni a, approval chu FIPB rawtna ang veka pek an ni a, a ti. Amah leh a fapa an puhna chu thu belhchian dawl lo a nih thu sawiin, politics leh mimal taka an beihna a nih thu a sawi. An puhna finfiahna pe turin BJP a cho let bawk. Congress hruai­tu dang Tom Vadakkan pawhin Chidambaram te pafa an puhnaah finfiahna engmah a awm lo a, politics lama phuba lak tumna mai niin a sawi ve bawk.