IT dept-in Lalu-a in an dap

Income Tax depatment chuan Bihar Chief Minister hlui, Lalu Prasad chu dik lo taka ram, cheng vaibelchhe 1,000 chuang man leinaa inhnamhnawiha puh a nihna kaihhnawihah, Delhi-a a chenna in an dapsak.

IT department hian RJD hotu, Lalu Prasad-a nena inzawmna nei, Delhi leh Gurugram-a company hrang hrang 22 an dap tel bawk a ni.

BJP chuan RJD hotu, a fanu MP Misa Bharti leh a fapa te pahnih, Bihar sorkar-a minister ni laite chu dik lo taka ram, cheng vaibelchhe 1,000 neiah a puh a, hemi hnu hian IT official-te hian an in leh company-te hi an dapsak nghal a ni.

Union Minister Ravi Shankar Prasad chuan kar kalta khan Lalu-a official residence chu a chhungte firm nia sawi a, a neitu address-ah hman a nih thu a sawi. Ram zau tak an nei theih nana Lalu Prasad-a te chhung hminga company awmte chuan hnathawktu chhawr an nei lo a, sumdawnna an kalpui lo bawk niin Prasad chuan a sawi.

Hetih lai hian RJD chuan Delhi-a an party hotu in dapsak a ni chu an dem thu sawiin, Lalu Prasad leh an party tihchhiat tumna a ni, an ti. He thil thleng chungchanga Bihar Chief Minister Nitish Kumar a ngawih reng chhan an zawt let nghal bawk.