Congress president hmu turin Mamata a zin

West Bengal Chief Minister Mamata Banerjee-i chu Congress Preident Sonia Gandhi hmu turin Delhi-ah a zin a, India president thlan tur chungchang a sawipui dawn.

Sonia Gandhi hian president thlan hunah eptu party zawng zawngten candidate inṭawm an neih theih nan hma a la a, a fapa leh Congress vice president Rahul Gandi nen eptu hruai­tu hrang hrangte an be kual tawh a ni. Kar hmasa pawh khan damdawi-ina awm chungin Sonia Gandh hian Mamata hi telephone-in a bia a ni.

President Pranab Mukherjee-a term hi kumin July thla hian a tawp tawh dawn a ni. Mukherjee hian president thlanna neih leh turah hian candidate atan parliament member-te’n lungrual taka an pawm vek a nih loh chuan chuh leh a tum lo nia sawi a ni.

President candidate siam tur chungchangah hian Gandhi-i hian Janata Dal United hruaitu Nitish Kumar leh Nationalist Congress Party hotu Sharad Pawar-te a be tawh a, Rahul Gandhi chuan Left party hotu Sitaram Yechury leh Samajwadi hruaitu Akhi­lesh Yadav-te a be bawk. President candidate siam tur bakah, eptute hian kum 2019 Lok Sabha inthlanpuia BJP tel lohna ṭangrual pawl siam dan tur pawh ngaihtuah an tum bawk.