Ni 75 chhung Covid Booster dose a thlawnin pe chhuak dawn

Sorkar laipui chuan India ram zalenna kum 75 lawmna, 'Azadi Ka Amrit Mahotsav' kalzelah vawiin aṭangin ni 75 chhung ram chhunga puitlingte tan Covid vaccine booster dose a thlawnin a pe chhuak dawn.

Covid vaccine hi pekchhuah chhunzawm reng a ni a, mi tam zawkin a dose thumna, booster dose hi an lak theihna turin sorkar chuan he ruahmanna hi a siam a ni.

Booster dose, precaution dose tia sawi bawk hi ram chhunga puitling, kum 18-59 inkar mi vaibelchhe 77 zingah 1% in an la tling lo a ni. Mahse kum 60 chung lam leh, healthcare leh frontline worker, mi vaibelchhe 16 zingah chuan 26% velin an la tawh thung.

Official chuan thla kua chuang liam taah India mipui a tam zawkin vaccine dose hnihna hi an la tawh a, ICMR (Indian Council of Medical Research) leh international research institution dangte chuan dose hnihna lak aṭanga thla ruk hnuah antibody level chu a tlahniam ṭan niin an sawi a, hei vang hian immune response tichak turin booster hi a ngai a ni, a ti. Sorkar chuan ni 75 chhung special drive kalpuiin, vawiin aṭangin kum 18-59 inkarte tan government vaccination centre hrang hrangah precaution dose hi a thlawnin a pe ṭan dawn a ni, a ti.

Union health ministry chuan kar liam ta khan Covid-19 vaccine dose hnihna leh precaution dose lak theih inkar chu thla kua aṭangin thla rukah a titawi. Hei hi National Technical Advisory Group on Immunization (NTAGI) thurawn anga siam an ni.

Kumin June 1 khan vaccine pekchhuah chak zawka kalpui leh, booster dose mi tam zawkin an lak theihna turin sorkar chuan 'Har Ghar Dastak campaign 2.0' chu state hrang hrangah a kalpui a, thla hnih awh tur programme hi kalpui chhunzawm mek a la ni bawk.

Sorkar data-a landanin, India ramah vaccine la thei chin zingah 96% in a dose khatna la tawhin, dose hnihna la hi 87% an awm tawh.

Nikum January 16 khan ram pumah Covid-19 pek chhuah ṭan a ni a, healthcare worker-te pek hmasak ber niin, February 2 aṭangin frontline worker-te pek an ni ve leh a ni. March 1-ah kum 60 chin leh, kum 45 chin natna benvawn neite tan vaccine hi pek chhuah ṭan a ni a, kum 45 chunglam tan April 1-ah pek an ni. Hemi hnu hian puitling, kum 18 chunglam tan May 1 aṭangin pek a ni a, kumin January 3 khan kum 15-18 inkarte pek niin, March 16 aṭangin kum 12-14 inkarte pek an ni ve leh bawk.

Ni 145 hnuah hri kai 20,000 chuang tling chho leh
Tun hnaiah ram chhunga hri kai an pung chho leh a, Nilaini khan hri kai thar 20,139 awmin, ni 145 hnuah a ṭum khatna atan hri kai thar hi 20,000 an tling chho leh a ni.

Daily positivity rate hi 5.10% niin, weekly positivity rate hi 4.37% a ni mek. Hri kai mek, active case pawh 1,36,076-ah a kai chho. Nilaini khan hripui vanga thi mi 38 awmin, Covid-19 hri vanga thi hi mi 5,25,557 an tling tawh a, hri kai tawh aṭangin 1.20% an tling.