Maha sorkarin petrol leh diesel man tihniam

Maharashtra cabinet chuan state sorkarin petrol leh diesel-a chhiah, Value Added Tax (VAT) a lak chu tihhniam a remti a, petrol man hi litre khat Rs 5 leh diesel litre khat Rs 3-in a hniam dawn a ni. Rate thar hi vawiin aṭangin an hmang ang.

Chief minister Eknath Shinde chuan fuel-a VAT lak tihhniam anih avang hian state sorkar chuan kum khatah Rs vaibelchhe 6,000 vel a hloh dawn niin a sawi a, mahse fuel man sang lutuk a ziaawm phah dawn a ni, a ti.

Deputy chief minister Devendra Fadnavis chuan he thutlukna harsa tak hi Shiv Sena-BJP sorkar chuan mipuite hmakhua ngaiin a siam a ni, a ti ve bawk. Maharashtra-a Shiv Sena-BJP sorkar thar hi kar hnih liam ta khan lakluh a ni a, CM atana lakluh a nih hnu lawkah Shinde chuan petrol leh diesel-a VAT lak hi tihhniam a ni dawn tih a lo sawi tawh a ni.

Chhiah lak tihhniam a nih hnuah Mumbai-ah petrol hi litre khat Rs 106.33 leh diesel litre khat Rs 94.28-ah a tlahniam dawn a ni. Pune-ah petrol litre khat Rs 105.88 leh, diesel litre khat Rs 92. 37 a ni bawk ang.