Parliament-a ṭawngkam hman loh tur list tichhuak

Parliament Monsoon session nei tura inbuatsaih mek karah, Lok Sabha Secretariat chuan nimin khan Parliament-a ṭawngkam hman loh tur chi, ṭawngkam mawi lo list ziahna booklet a tichhuak.

Booklet-a Parliament-a ṭawngkam hman mawi lo chi nia tarlan zingah hian 'Covid spreader', 'snoopgate', 'anarchist', 'Shakuni', 'dictatorial', 'Khalistani' te pawh an tel. List-a ṭawngkam hman loh tur chi nia sawite hi House-a debate leh thusawinaa hman a nih chuan, heng ṭawngkamte hi paih a ni ang tia tarlan a ni. Hemi rual hian heng ṭawngkam paih chungchangah Rajya Sabha Chairman leh Lok Sabha Speaker-te chu thutawp siamtu an ni ang.

He thil hi eptu lamten nasa takin an sawisel zui a, Trinamool MP Derek O'Brien chuan ṭawngkam hman loh tura tarlan zinga mi - ashamed', 'abused, 'betrayed', 'corrupt', 'drama', 'hypocrisy' leh 'incompetent' tihte chu a hman chhunzawm zel tur thu a sawi.

Congress MP Jairam Ramesh pawhin eptuten Modi kaihhruai sorkar tlin tawk lohna leh dik tawk lohna an sawina ṭawngkamte chu Parliament ṭawngkam ni lo tia dah vek a ni, a ti.