Covid-19 kai enkawl dam Nuai 5.9 chuang tawh

Nitinin India ramah Covid-19 kai hmuh chhuah thar tam tak awm reng mah se enkawl dam pawh an tam tawh hle a, nimina sorkar report tihchhuah thlengin mi 5,92,032 chu enkawl dam an ni tawh.

Ministry of Health and Family Welfare chuan nimina report an tihchhuahah report an tihchhuah hma darkar 24 chhungin hri kai tawh dama puan 20,572 an awm tih an puang a, darkar 24 chhunga mi sing hnih chuang dama puan ni hi a thleng tam lo hle. Enkawl dam tawh rate hi 63.24% a tling tawh a ni.

Nimina sorkar report tihchhuahah hri kai hmuh chhuah thar 29,429 an awm leh a, hei hi ni khata hri kai hmuh chhuah tam ber ni a ni leh a, hetiang renga hri kai hi an pung chak a nih chuan kar loah India ramah Covid-19 kai maktaduai an awm tling thuai dawn a ni. Nimin thleng khan hri kai hmuh chhuah 9,36,181 an awm tawh.

India ramah hian hri kai mek 3,19,840 an la awm a, nimina sorkar report-ah chuan thihpui 582 lai awm lehin mi 24,309-in hripui hi an thihpui tawh a ni. Thipui rate hi 2.60% a ni a, State leh UT 30-ah chuan national average aiin thihpui rate a hniam zawk.

Indian Council of Medical Research (ICMR) chuan nimina report an tihchhuahah darkar 24 chhungin sample 3,20,161 lai ramchhung hmun hrang hrang laboratory-ah an test tih an tarlang a, hei hi ni khata test an neih tam ber ṭum a ni leh. ICMR hian hrilen ṭantirh aṭanga nimina report an tihchhuah thleng hian Covid-19 sample 1,24,12,664 an test tawh a ni.

Ramchhung hmun hrang hrangah ICMR pawmpui Covid-19 test-na laboratory 1,223 a awm tawh a, heng zinga 865 hi sorkar laboratory niin 358 chu private laboratory a ni thung.