Sachin Pilot leh MLA hel dang 18 hnenah Insawifiah tura hriattirna pe

Rajasthan Assembly speaker CP Joshi chuan Congress sorkar laka hel, Sachin Pilot leh MLA dang 18-te chu party thupek an ngaih pawimawh loh avangin July 17 thleng in­sawifiah turin hriattirna a pe. 

Rajasthan sorkar-a chief whip, Mahesh Joshi chuan Pilot lakah complaint a thehluh hnuah speaker hian hriattirna hi a pe ta a ni. Party thupek kalha an awm avangin Pilot leh amah thlawptu MLA 18-te hi Congress aṭangin hnawhchhuah theih an ni. 

Chief minister Ashok Gehlot leh a kaihhruai sorkar laka a hel avang leh Congress Legistative Party meeting ṭum hnihah a tel duh loh avangin  Sachin Pilot hi deputy chief minis­ter leh Rajasthan Cong­ress president a nihna aṭangin ban a ni tawh bawk. 

Sachin Pilot chuan ban a nih hnuah thu dik chu sawibuai ni ṭhin mah se hnehina awm dawn lo tih a sawi a, BJP a zawm dawn lo tih a sawi nawn leh bawk. "Rajasthan-ah Congress chakna turin theihtawp ka chhuah a, engvangin nge ka party ka beih let ang?" tiin BJP a zawm dawn nia thuthang awm chu a chhang let. BJP a zawm dawn nia sawitute chu a hming tihchhiat tumtute an ni tiin, a nihna hlihsak a nih hnuah pawh Congress sawichhe zawngin ṭawngkam khat pawh a la chhakchhuak lo tih a sawi. 

Pilot chuan Congress president aṭanga Rahul Gandhi a ban hnu khan Ashok Gehlot leh a thurual­ puite chuan amah hnuh hniam tumin an bei nghal niin a sawi a, a zahawmmna humhim turin theihtawp a chhuah tih a sawi. Gehlot nena an ngaih­dan inang lo chungchang­ah Pilot chuan, "A lakah ka thinrim a ni lo. Thuneihna sang zawk leh duhsak bik tak nih pawh ka phut bik lo. Ka duh ber chu Rajasthan-ah Congress sorkar hian inthlan dawna mipui hnena kan lo tiam tawhte tihhlawhtling turin thawk se tih hi ka duh ber a ni," a ti. Mahse a duh anga hnathawh chu Gehlot chuan a remtih sak lo a, bureaucrats ho pawh a thu zawm lo tura hrilh an ni a, a hnenah file engmah thawn ni loin, thla eng emaw zat chu cabinet meeting leh CLP meeting pawh a buatsaih lo a ni, a ti. Hei vang hian a thutiamte hlen theih siloha dinhmun pawimawh chelh reng chu awmzia a awm lo tiin a sawi a ni.