Jammu and Kashmir-ah Firfiakte dapchhuah beihpui thlak

Jammu and Kashmir-a Shopian district-ah firfiak eng emaw zat an awm nia thu an dawn avangin security force 1,000 vel chuan firfiakte dapchhuah tumin beihpui an thlak.

Sipaite hian Thawhlehni zan zanlai aṭang khan beihpui hi an thlak ṭan a, beihpui thlak hna hi Indian Army leh Special Operation Group (SOG)-te'n an thawk a ni.

Shopian district-a Heff leh Shirmal khuaah firfiak dapchhuah hna hi thawh mek a ni.

Intelligence lam chuan Shopian bula ramhnuaiah Hizbul Mujahideen firfiak 10 vel an biru niin thu an dawng a ni.

Security force-te chuan firfiakte zawng hian in 500 chuang an dap. Tun ṭum hi ni 15 chhunga Shopian-a firfiakte zawnga beihpui an thlak ṭum hnihna a ni. Kar hmasa Nilaini-a army officer Ummre Fayaz-a ruang, Shopian-a hmuh a nih khan firfiakte dap hna hi thawh a lo ni tawh bawk.

Hetih lai hian J&K-a Line of Control (LoC)-a security dinhmun ennawn tur leh, Kashmir Valley-a zirlaite dinmun ngaihtuah turin Defence Minister Arun Jaitley leh Army Chief General Bipin Rawat-te chuan Jammu and Kahmir an tlawh a, hei hi Jaitley-a'n Manohar Parrikar-a kut aṭanga defence charge a lak hnua J&K a tlawhna hmasa ber a ni.

Pakistan sipaite chuan nimin khan Balakote sector-a LoC-a inkahhai puan chu palzutin, Indian post te an kap leh. Defence thupuangtu chuan zanlai pelh hnu deuhah silai hi an hmetpuak niin a sawi a, hei bakah hian Rajouri district-ah Indian army post bakah civil chenna bialte pawh an kap bawk a, zing dar 1.30 thleng an kap niin a sawi.

Pakistan sipaiten silai an hmeh­puah reng avang hian LoC dunga awm mi 1,700 vel chu hmun him lamah sawnchhuah an ni a, relief camp-ah sawn an ni. Rajouri Deputy Commissioner chuan Pakistan-te silai hmehpuah avang hian ramri hrula cheng chhungkaw 2,694 chuang, mi 10,042 vel a nghawng niin a sawi.