Hri kaite enkawl danah Guideline siam turin SC-in hriattir

Surpeme Court chuan Covid-19 kaite enkawlna tur senso chung changah inkaihhruaina, guideline siam turin union health ministry a hriattir. Court chuan hri kai damdawi-ina enkawl te chu a inenkawlna senso hautak mah se, pawisa an neih loh avanga chhuah tir an ni tur a ni lo, a ti. 

Private damdawi-ina Covid-19 hri kaite enkawlna tur senso chung changa inkaihhruaina (guideline) siam a nih theih nan advocate Sachin Jain chuan SC-ah petition a thehlut a, SC chuan he petition hi a ngaihtuah hnuah court-in inkaihhruaina a siam theih loh thu leh, Covid-19 enkawlna senso tur chungchanga kalpui dan tur ṭha, thurawn court-in a pek theih loh thu a sawi. 

Sorkar laipui aiawh, Solicitor General Tushar Mehta chuan sorkarin affidavit a siam thu leh, Clinical Establishments (Registration and Regulation) Act, 2010 hman mek niin hemi zulzui hian Covid-19 hri kaite chu private hospital-ah pawh a thlawn deuh thawa enkawl theih an nih thu a sawi. Mahse state sorkar chuan  enkawlna man senso chungchangah thuneihna an nei tiin Mehta chuan a sawi a, chuvang chuan ram pumah Covid-19 hri kaite enkawlna tur man inang veka siam a har thu a sawi bawk.