India leh China sipai aiawhte inbia
India leh China sipaite chuan Line of Actual Control (LAC)-ah Thawhlehni khan ramria buaina chungchangah inbiakna an nei leh niin media-te chuan an tarlang a, an inbiak dan chanchin kimchang erawh puanzar a ni lo.
Remna zawnga inbiak vawi lina an neihah hian India aiawhin Leh khuaa 14 Corps-a Lieutenant General Harinder Singh kaihhruaiin an tel a, China lam aṭanga sipai palaite hi South Xinjiang military region-a Major General Liu Lin-a'n a ho a ni.
Ram pahnih inbiakna neihah hian LAC huam chhunga Pangong Tso leh Depsang hmun telin, helai hmuna sipai la awmte chu inhnukkir tura rel a ni. June 15-a Ladakh, Galwan valley-a ram pahnih sipai intihbuaina a thlen hma khan India chuan Ladakh hmarchhak lam zawng zawng hi status quo-a dah ve turin China chu an lo phut tawh a ni.
China sipaite hi Gogra, Hot Springs leh Galwan valley-ah te an tawlh kir tawh nia sawi a ni a, Pangong Tso hmuna Finger four-a China sipai la awm te chu tawlh kir turin India hian China a ngen tawh bawk.