Union Environment minister a thi

Union Environment Minister Anil Madhav Dave chu cardiac arrest natna avangin kum 60 mi niin nimin khan a thi.

Anil Madhav Dave hi a awm nawm loh avangin nimin zing khan AIIMS damdawiin panpui a ni a, damdawi-in thlenpui a nih hnu lawkah a thi a ni.

Dave hi kum 2009 aṭangin Rajya Sabha member a ni a, kum 2016 kha Union Minister of State atan lakluh niin, environment, forest and climate change a chang a ni.

Ujjain-a piang, Dave hian a tlangval laiin Rastriya Swayamsevak Sangh (RSS) a zawm a, kum 2003-a Madhya Pradesh assembly inthlan neih hma khan BJP-ah a lut a ni. Lehkha ziak lama thawh hlawk tak niin, Hindi ṭawngin lehkhabu pakua a ziak. A lehkhabute hi Marathi, Malayalam, Gujarati leh Kannada ṭawngten lehlin an ni a, English-in ‘Beyong Copenhagen’ tih a ziak bawk.

Politics lama a luh hnu pawhin leilung humhalhna lam a buaipui zui hle a, tuikhuah lian tak tak siamte chu a dodal ṭhin. Tripura Chief Minister Manik Sarkar chu a khawsak dan tlawm tak avangin a ngaisang thei hle bawk.

Ram hruaitu hrang hrangin minister Dave an ui thu hi an sawi a, President Pranab Mukherjee chuan mimal tak pawha a ui thu a sawi a, a chhungte a tawrhpui thu a sawi bawk. Prime Minister Narendra Modi pawhin a ṭhianṭha tak thihna chuan a nghawng hle tih sawiin, Anil Madhav Dave chu ram tana inpe, ram leilung humhalh a nih theihna tura theihtawp chhuhtu tia hriatreng a nih tur thu a sawi. Dave nen chuan a hma zan pawhin thil pawimawh tak tak an sawi dun tih sawiin, a kal mai chu a tuar takzet tih a sawi. Minister thi sun nan hian nimin khan ram pumah hnam puanzar a ngul chanve-a zar a ni.

Anil Madhav Dave a thih tak avang hian Science and Technology Minister Harsh Vardhan chu Environment Ministry chang tel tura tih a ni. Prime Minister Modi-a thurawn angin, President Mukherjee chuan Harsh-a hnena Environment ministry chelh kawp tura hriattirna hi nimin khan a ti­chhuak nghal.