Indian Army-in artillergy gun thar dawng

Indian Army chuan kum sawmthum chhunga a vawi khat nan nimin khan US aṭangin artillery gun pahnih an dawng. Sipaiten laipui an dawn hi dollar maktaduai 700 man 145 an order zing ami, M-777 ultra-ligth howitzer gun a ni.

Kum 30 dawn kaltaa Bofors scandal a thlen hnuah tun ṭum hi army-in howitzer an neih lehna hmasa ber a ni. Nakkum kum laihawlah a dang pathum a lo thlen leh beisei a ni. Hengte hi Indian Army-te’n training na atan an hmang ang. M-777 gun hi US, Canada leh Australia sipaiten an hmang mek a ni.

Nimin tlai khan M-777 gun pahnihte hi Pokhran-ah enchhin nghal an ni a, an enchin ni hi kum 1974-a Indira Gandhi kaihhruai sorkarin nulear test a neih hmasak ber ni a ni bawk.

Indian Army-te laipui dawn hi BAE Systems siam a ni a, 155mm/39 calibre gun niin, km 30 chin kap pha tura duan a ni. Indian Army-in laipui 145 a order aṭangin, BAE styem chuan 25 a rawn thawn dawn a, a bak 120 chu India ramah Mahindra-in a lo remkhawm ve thung dawn a ni. US-in a thawn tur chin hi kum 2021-ah thawn kim vek hman tura beisei a ni bawk. Laipui leina tura inremna hi kum 2010 aṭang khan buaipui ṭan a ni a, nikum June 26 khan inremna siam a nih thu hi puan a ni chauh a ni. M-777 gun 145 leina tura inremna hi Foreign Military Sales (FMS) deal hnuaiah siam a ni.

Army chuan regiment 170 dawn chu M-777 artillergy gun nena thuam chak vek a tum a ni.