India-ah monkeypox kai hmu chhuak ; State tinte fimkhur turin chah an ni

Khawvel huapa monkeypox hri kai an pung zel leh, India ramah he hri kai hmuh an awm ve tak avangin sorkar laipui chuan state tinte chu fimkhur turin a chah. Monkeypox kai leh kai theih nia rinhlelhte chu entry point-ah screening leh test neihsak vek turin a ti.

Monkeypox hri kai hi ram 50-ah hmuh a ni tawh a, hri kai zinga a tam ber, 86% hi European region-ah hmuh an ni a, America-ah 11% an awm bawk.

Union health secretary Rajesh Bhushan chuan state hrang hrangte hnena lehkha a thawnah, monkeypox hri hi darh chak lo mah se, ram hrang hrangah erawh hri kai hi hmuh belh zel a ni, a ti. Hei vang hian he hri lakah hian lo invenlawk hi aṭul tih a sawi a ni. Hri kai nia rinhlelhte uluk taka thlithlai a, a hri kaite rang taka enkawl chu he hri vanga thihna thleng thei tur laka invenna pawimawh a nih thu Bhushan chuan a sawi.

Kerala-ah UAE aṭanga haw, mi pakhat chuan monkeypox hi a kai tih hmuh chhuah a nih thu Ningani khan state health minister Veena George chuan a sawi. Minister chuan hri kai an hmuh hi Thawhlehnia Thiruvananthapuram airport-a rawn thleng a ni tih sawiin, a ngaihtuahawm lo tih a sawi bawk. Monkeypox kai hmuh a nih veleh, sorkar laipui chuan National Centre for Disease Control (NCDC) expert team chu Kerala-ah hian a tir nghal bawk.

Monkeypox hian khawsik thlenin, pangti bawl leh nghawng bawr vela bawl lian leh thak tak tein a rawn lanchhuah bakah, natna dang eng emaw zat a thlen thei bawk. Hri hian kar hnih aṭanga kar li thleng a awh thei. He hri hi mihring emaw, ran emawin an kai a, an bul hnaihah awm leh bungruaa hri a lo kai aṭangin a kai chhawn ve theih a ni. Sazu, chhimtir leh thehleiten an pudarh thei bawk. Smallpox aiin inkaichhawn a harsa zawk a, dam lohna pawh a thlen nep zawk a ni.

He hri hi strain pahnih awmin, a hlauhawm zawk Congo strain kai zinga 10% chuan an thihpui a ni. West African strain chu a thawk na lo zawk a, thihpui pawh 1% vel an ni. Monkeypox hi Africa ram pawn lamah hian a leng khat hle a, mahse kuminah erawh he hri la hmuh ngai lohna Europe ram hrang hrangah a leng mek.