Parliament compound-ah nawrh huaihawt khap a ni

Rajya Sabha Secretariat-in nimina bulletin a tihchhuahah, Parliament member-te chuan Parliament compound chu lungawi lohna lantirna atan an hmang tur a ni lo tiin, hei hian dharna, strike, chaw nghei leh sakhaw puithuna lantirnate a huam vek a ni.

Parliament-a ṭawngkam hman loh tur list tihchhuah chungchang sawizui a, eptu lamin an sawisel mek laiin he thupek dang hi nimin khan tihchhuah a ni zui leh bawk.

Session lai hian eptuten sorkar laka lungawi lohna hi Parliament compound chhungah an lantir fo a, complex chhunga Mahatma Gandhi lim bul chu nawrh huaihawtna atan an hmang fo a ni.

Tawngkam hman loh tur list siam chu eptuten nasa taka an sawisel hnuah, Lok Sabha Speaker Om Birla chuan ṭawngkam an tarlante chu Parliament-ah hman khap vek tihna a ni lo tih sawiin, mahse record-ah erawh paih theih an ni, a ti. Member-te chuan House zahawmna vawng nung chungin, an ngaihdante chu zalen takin an sawichhuak thei a ni, a ti.