AIADMK-in Panneerselvam fapa 2 hnawtchhuak leh

Tamil Nadu-a eptu party lian ber, AIADMK chuan chief minister hlui leh party treasurer, O Panneerselvam chu an party aṭanga an hnawhchhuah hnuah, a fapate pahnih bakah hruaitu dang 16 an hnawtchhuak leh.

E Palaniswami kaihhruai AIADMK hian Panneerselvam fapa te, Lok Sabha-a AIADMK MP neihchhun Raveednranath leh Jeyapadeep-te an hnawtchhuak leh a, anni bakah party hruaitu 16 an hnawhchhuah zingah hian minister hlui Vellamandi N Natarajan a tel a ni. AIADMK chuan Panneerselvam leh a thurualpuite hi an party kalha an chet avanga hnawtchhuah an nih thu an sawi.

Hetih lai hian Panneerselvam hian party hruaitu atan member-te thlan tlin a ni a, E Palaniswami leh hruaitu dangte hian party aṭanga hnawhchhuah theihna an nei lo tih sawiin, amah hian Palaniswami leh member dang 21-te chu party aṭangin a hnawhchhuah thu a sawi ve thung. Nimin khan party hruaitu dang 44 a hnawhchhuah belh ve leh bawk a, an zingah hian minister hlui 14 an awm.