Vawiinah President thlang dawn ; MLA zingah UP MLA-te vote a hlu ber
India President thar tur chu vawiin hian thlan a ni dawn a, zing dar 10 aṭang tlai dar 5 thleng vote thlak theih a ni dawn a, July 21-ah result puan a ni ang.
President hi Parliament elected member leh state assembly legislator-te awmna, electoral college-in an thlang dawn a, nominated member-te erawh chuan an thlang ve thei lo.
State tin MLA-te vote hlut zawng hi a in ang lo a, Uttar Pradesh MLA vote hlut lam hi a sang ber a, MLA pakhat vote hlut lam 208 a nih laiin, Jharkhand leh Tamil Nadu MLA-te vote hlut lam hi 176 a ni a, Maharashtra chu 175 a ni. Nagaland MLA-te vote hlut zawng pakua, Mizoram pariat leh Sikkim MLA vote hlut lam hi pasarih a ni thung. MP-te vote hlut zawng hi 700 a ni. Electoral college-ah hian MP 776 leh MLA 4,033 an awm.
MP-te vote hlut zawng hi inthlan hmasaah chuan 708 a ni a, mahse kuminah hian Jammu and Kashmir-ah legislative assembly member an awm loh avangin an vote hlutna hi a tlahniam a ni. MP vote hlut zawng hi state leh UT-a legislative assembly elected member awm zat aṭanga chhut a ni.
Parliament member leh MLA-te hian vote thlakna tur ballot paper rawng in ang lo an hmang dawn a, MP-te hian rawng hring an hmang dawn a, MLA-ten a sendang-a chhut an hmang thung ang.
President thlan turah hian rorellai, BJP kaihhruai National Democratic Alliance (NDA) candidate Droupadi Murmu leh eptu party-te joint candidate Yaswant Sinha-te an inbitum ang.
NDA-a tel lo, eptu party ṭhenkhat chuan Murmu-i an thlawp tur thu an sawi. Regional party - BJD, YSR-CP, BSP, AIADMK, TDP, JD (S), Shromani Akali Dal leh Shiv Sena bakah JMM chuan NDA candidate hi an thlawp dawn tih an sawi a, hei vang hian inthlanah Murmu hian vote tla aṭangin 60% a hmuh phak rin a ni. Candidate atana puan a nih tirh khan vote hi 50% vel hmu tura chhut a ni.
President thlangtute vote hlut zawng hi 10,86,431 a ni dawn a, regional party hrang hrangten an thlawp tur thu an puan thar zel hnuah Murmu hian vote awm zat aṭangin nuai 6.67 a hmu pha dawn a ni.