Jantar Mantar-ah Dalit-te’n lungawi lohna lantir

Uttar Pradesh, Saharanpur-a Dalit hnamte laka pawikawihna thleng duh lohna lantirin nimin khan, Delhi-a Jantar Mantar-ah Dalit hnamten lungawi lohna an lantir a, mi 50,000 vel an pungkhawm.

Nawrh hi Bhim Army pawl huaihawt a ni a, pungkhawmte hian lukhum pawl an khum a, an lungawi loh thute ziakin an tarlang.

Jantar Mantar-a Dalit pungkhawmte chuan thil pathum an phut thu tarlangin, May 5-a Saharanpur-a tharum thawhna thleng chungchang chhui chian te, Dalit mi an in halsakte zangnadawmna pek te leh, Thakur hnam chunga hremna lekkawhte an phut a ni.

Sahanpur-a pawikhawihna thleng hi Uttar Pradesh-a political party-te pawhin inbeihna atan an hmang nasa hle, Bahujan Samaj Party (BSP) hotu Mayawati chuan Chief Minister Yogi Adityanath-a kaihhruai sorkar chu na taka demin, an state chhunga boruak muanawm siam thei loah a puh.

May 5 khan Saharanpur-ah hian Thakur ho pungkhawm chuan music ring tak tak an tichhuak a, hei hi a bula cheng, Dalit hoin an sawisel avangin buaina nasa tak a chhuak a ni. Thakur ho hian Dalit mite chenna-in eng emaw zat an halsak a ni. Hei bakah hian May 9-a Dalit-te’n ‘mahapanchayat’ huaihawt an tum chu district thuneituten an remtih sak loh avangin an buai zual a ni.