NDA sorkarin J&K buaina ala chingfel ngei ang : Rajnath Singh
Union Home Minister Rajnath Singh chuan Jammu and Kashmir-a tualchhung buaina thleng fo chu BJP kaihhruai NDA sorkar chuan a la chinfel ngei tur thu a sawi.
Rajnath Singh chuan Kashmir-a buaina chhuak ṭhinah hian Pakistan a inrawlh ṭhin thu sawiin, Pakistan chuan India beihna remchangah a hmang a ni, a ti.
J&K-ah hian April 9-a Srinagar-a Lok Sabha by-election neih a nih aṭang khan buaina a chhuak a, tun thlengin boruak ala ziaawm thei lo a ni. Buaina chhuak vang hian security force-te silai hmehpuahah mi pariat an thi tawh a ni. Zirlai tam tak chuan security force-te chetdanah lungawi loin nawrh an la huaihawt reng a ni.
Tualchhung boruakin ziaawm lam a pan theih loh avangin Election Commission chuan April 12-a Anantnag Lok Sabha seat by-election neih tur pawh a sawn hla a ni.
Nikum khan Hizul Mujahideen firfiak pawl commander Burhan Wani thah a nih avangin tualchhung miten lungawi lohna lantirin, security force-te nen nasa takin an lo intihbuai tawh bawk.